Tiranë, 19 Qershor 2026 – Qeveria shqiptare ka vendosur të ndërpresë funksionimin e Bordit të Transparencës për Karburantet, duke i kthyer tregut të hidrokarbureve lirinë e plotë të përcaktimit të çmimeve. Vendimi u bë i ditur zyrtarisht nga Ministrja e Ekonomisë, Delina Ibrahimaj, pas përfundimit të mbledhjes së Këshillit të Ministrave.

Bordi i Transparencës u ngrit si një mekanizëm emergjence më 23 Mars 2026, me qëllim ngrirjen e marzheve të fitimit dhe tavanizimin e çmimeve të naftës e benzinës, pas shtrenjtimit galopant që pësoi tregu ndërkombëtar si pasojë e shpërthimit të konfliktit ushtarak në Lindjen e Mesme.

Sipas deklaratës së ministres Ibrahimaj, ky vendim vjen si pasojë e stabilizimit të situatës në tregjet ndërkombëtare, ku çmimet e arritura në bursën "Platts" kanë njohur rënie të ndjeshme javët e fundit.

“Një vendim tjetër shumë i rëndësishëm lidhet me përfundimin e situatës së veçantë në tregun e hidrokarbureve. Sot do të ndërpresim Bordin e Transparencës që prej disa muajsh është në funksion. Çmimi prej dy javësh ka ardhur duke u reduktuar, në bursë ka rënë”, u shpreh Ministrja Ibrahimaj gjatë konferencës për mediat.

Me shpërbërjen e këtij bordi, i cili gjatë muajve të operimit ka qenë shpesh në qendër të debateve mes grupimeve të biznesit dhe konsumatorëve, çmimet e shitjes me pakicë në pikat e karburanteve në të gjithë vendin do të rregullohen sërish nga ligjet e ofertës dhe kërkesës në tregun e lirë.