Ukraina ka ndërmarrë një tjetër sulm me raketa me rreze të gjatë veprimi ndaj objektivave strategjike ruse, duke goditur për herë të dytë brenda një jave një rafineri nafte në rajonin e Moskës. Sipas raportimeve, shpërthimi shkaktoi dëme të konsiderueshme në objekt, ndërsa pjesë të çatisë së rafinerisë u hodhën në ajër nga forca e goditjes.

Presidenti ukrainas, Volodymyr Zelensky, deklaroi se sulmet janë një përgjigje e drejtpërdrejtë ndaj ofensivës së vazhdueshme ruse kundër qyteteve ukrainase.

“Ky është një reagim plotësisht i justifikuar ndaj sulmeve ruse kundër komuniteteve tona dhe një tjetër rezultat i rëndësishëm i operacioneve kundër objektivave që mbështesin makinën ushtarake ruse,” shkroi Zelensky në rrjetin Telegram.

Ai falënderoi Forcat e Mbrojtjes dhe Sigurisë së Ukrainës, si dhe njësitë raketore për saktësinë e treguar gjatë operacionit, duke theksuar se partnerët ndërkombëtarë kanë vlerësuar efektivitetin e sulmeve ukrainase me rreze të mesme veprimi.

Gjatë mbërritjes në Bruksel për takimin e ministrave të Mbrojtjes të NATO-s, Zelensky përsëriti qëndrimin e Kievit ndaj luftës, duke deklaruar se “nëse Ukraina digjet, edhe Moska do të digjet”, ndërsa theksoi se vendi i tij mbetet i gatshëm të reagojë nëse Rusia vazhdon agresionin ushtarak.

Ndërkohë, Këshilli Europian ka sinjalizuar një qasje më të vendosur ndaj konfliktit, duke theksuar se Bashkimi Europian ka një rol kyç në arritjen e një zgjidhjeje të ardhshme dhe është i gatshëm të mbrojë interesat e tij strategjike.

Në deklaratën e tij, Këshilli dënoi gjithashtu sulmin rus ndaj manastirit Lavra e Peçerskut në Kiev, një monument i mbrojtur nga UNESCO, si dhe veprimet që cilësohen si ndërhyrje të huaja informative dhe kërcënime ndaj përfaqësive diplomatike europiane në Ukrainë.

Liderët europianë shprehën shqetësim edhe për incidentet e fundit që kanë prekur territorin e vendeve anëtare të BE-së, përfshirë rastin e një droni rus që goditi një ndërtesë në Rumani. Sipas tyre, këto zhvillime janë pasojë direkte e luftës së Rusisë kundër Ukrainës dhe përbëjnë rrezik për sigurinë rajonale.

Në përfundim, Këshilli Europian i bëri thirrje Moskës të pranojë një armëpushim të plotë, të menjëhershëm dhe pa kushte, si dhe të angazhohet në negociata serioze për arritjen e një paqeje të drejtë dhe të qëndrueshme.