Kinshasa – Numri i viktimave nga shpërthimi i virusit Ebola në Republikën Demokratike të Kongos ka kaluar shifrën 200, ndërsa autoritetet shëndetësore po shtojnë përpjekjet për të frenuar përhapjen e sëmundjes në rajonin lindor të vendit.

Sipas të dhënave të publikuara nga Qendrat Afrikane për Kontrollin dhe Parandalimin e Sëmundjeve (Africa CDC), rastet e konfirmuara kanë arritur në 875 që nga shpallja e shpërthimit më 15 maj, ndërsa numri i të vdekurve ka shkuar në 202. Shkalla e vdekshmërisë aktualisht llogaritet në rreth 23 për qind.

Virusi po përhapet kryesisht në provincat lindore të Iturit, Kivusë Veriore dhe Kivusë Jugore, me provincën e Iturit që përbën afro 95 për qind të rasteve të raportuara.

Ndërkohë, përhapja e sëmundjes ka kaluar edhe kufijtë e Kongos. Në Ugandën fqinje janë konfirmuar 19 raste me Ebola, përfshirë dy viktima.

Autoritetet shëndetësore afrikane kanë bërë të ditur se janë rritur kapacitetet laboratorike të testimit dhe sistemet e mbikëqyrjes dixhitale, me qëllim identifikimin dhe izolimin sa më të shpejtë të rasteve të reja.

Drejtori i Përgjithshëm i Africa CDC, Jean Kaseya, ka paralajmëruar se situata mund të përshkallëzohet në përmasa të ngjashme ose edhe më të rënda se epidemia e Afrikës Perëndimore gjatë viteve 2014–2016, e cila shkaktoi mbi 11 mijë viktima në Guine, Liberi dhe Sierra Leone.

Për të vlerësuar nga afër situatën, ministri kongolez i Shëndetësisë, Roger Kamba, vizitoi këtë të enjte qytetin Bunia, kryeqendra e provincës së Iturit, ku zhvilloi takime me ekipet e reagimit dhe autoritetet lokale për forcimin e masave kundër përhapjes së virusit.

Nga ana tjetër, shkencëtarët e përfshirë në hetimin epidemiologjik kanë arritur në përfundimin se varianti aktual i virusit, Ebola Bundibugyo, lidhet me një transmetim të ri nga jeta e egër tek njerëzit. Sipas tyre, nuk ka prova që shpërthimi aktual të jetë vazhdim i ndonjë epidemie të mëparshme të mbetur e pazbuluar.

Autoritetet shëndetësore ndërkombëtare vijojnë të monitorojnë situatën, ndërsa shqetësimi për një përhapje më të gjerë në rajon mbetet i lartë.