Francë/Belgjikë – Një operacion i gjerë i zhvilluar nga autoritetet franceze dhe belge ka çuar në goditjen e një organizate kriminale të dyshuar për trafik ndërkombëtar të lëndëve narkotike, me shtatë shtetas shqiptarë të arrestuar dhe sasi të konsiderueshme droge të sekuestruara.

Sipas autoriteteve, operacioni nisi më 10 qershor në rajonin e Bretanjës, në Francë, ku xhandarmëria franceze kreu 12 kontrolle të njëkohshme. Gjatë aksionit u arrestuan katër shtetas shqiptarë, të moshave 21, 30, 30 dhe 32 vjeç, të cilët dyshohen se ishin pjesë e një rrjeti kriminal që organizonte trafikun e drogës mes Belgjikës dhe Francës.

Prokuroria e Rennes bëri të ditur se të dyshuarit janë vënë nën hetim nga Juridiksioni Ndërrajonal i Specializuar (JIRS) dhe janë lënë në paraburgim.

Një ditë më vonë, më 11 qershor, autoritetet belge zhvilluan 14 kontrolle të tjera, duke arrestuar pesë persona të dyshuar, mes tyre tre shtetas shqiptarë.

Organizatë e strukturuar kriminale

Sipas hetimeve, të zhvilluara prej disa muajsh, grupi kriminal shqiptar organizonte transportin e lëndëve narkotike nga Belgjika drejt Francës. Prokurori i çështjes, Frédéric Teillet, deklaroi se organizata përdorte një apartament në Belgjikë si laborator për pranimin, përpunimin dhe paketimin e drogës përpara shpërndarjes në treg.

Autoritetet zbuluan se transporti kryhej përmes automjeteve të pajisura me vende të fshehta të sofistikuara, të ndërtuara posaçërisht për të shmangur kontrollet policore.

Sekuestrohen drogë, armë dhe pasuri me vlerë

Gjatë operacionit, forcat e rendit sekuestruan 13 kilogramë kokainë, 26 kilogramë produkte kimike të përdorura për përzierjen e drogës, si dhe sasi acetoni dhe amoniaku të përdorura në procesin e përpunimit.

Po ashtu, u gjetën pajisje për paketimin e narkotikëve dhe një presë për kokainë me logo të ndryshme, e përdorur për përgatitjen e lëndës për treg.

Në kuadër të hetimeve u sekuestruan edhe dy pistoleta dhe një armë gjahu.

Autoritetet konfiskuan gjithashtu 19 automjete, disa prej tyre të kategorisë luksoze, si dhe bizhuteri me vlerë të përgjithshme të vlerësuar rreth 400 mijë euro.

Gjatë kontrolleve u gjetën mbi 90 mijë euro para në dorë, ndërsa 37 mijë euro të tjera u bllokuan në llogari bankare. Në Belgjikë, autoritetet ngrinë gjithashtu 38 llogari bankare të lidhura me hetimin.

Hetimet për identifikimin e personave të tjerë të përfshirë në rrjetin e trafikut të drogës vijojnë.