Itali – Një 23-vjeçar me origjinë shqiptare, i arratisur mëngjesin e së enjtes nga burgu i Brindisit, është arrestuar disa orë më vonë pas një operacioni të gjerë kërkimi të zhvilluar nga forcat italiane të rendit.

Lajmi për arratisjen e të riut shqiptar, Xhuljano Quku, u bë publik fillimisht nga sindikata e policisë penitenciare SAPPE dhe më pas u konfirmua nga autoritetet.

Sipas rindërtimit të ngjarjes, i riu përfitoi nga momenti i hapjes së oborrit të shëtitjes për të kapërcyer murin e sigurisë dhe për t’u larguar nga institucioni penitenciar.

Sindikata pretendon se arratisja u lehtësua nga mungesa e personelit, pasi polici i shërbimit ishte i detyruar të mbulonte disa poste njëkohësisht.

“Polici në detyrë duhej të mbikëqyrte njëkohësisht oborrin e shëtitjes dhe repartet e tjera të burgut, përfshirë një sektor me të burgosur nën mbikëqyrje të lartë”, deklaroi SAPPE.

Sindikata ka ngritur gjithashtu shqetësimin për mbipopullimin dhe mungesën e stafit në burgun e Brindisit, duke theksuar se numri aktual i efektivëve është i pamjaftueshëm për të garantuar sigurinë e institucionit.

Arrestimi pas disa orësh kërkime

Pas arratisjes, autoritetet nisën menjëherë operacionin e kërkimit në të gjithë provincën e Brindisit. Pas disa orësh, 23-vjeçari u lokalizua dhe u arrestua në Latiano, zonë ku banon e dashura e tij.

Operacioni u realizua nga agjentët e Komisariatit të Mesagnes dhe efektivët e policisë së burgjeve, me mbështetjen e karabinierëve.

Sipas mediave italiane, i riu jetonte në Mesagne përpara arrestimit të tij disa muaj më parë. Ai po vuante një dënim për vepra penale që lidhen me posedimin e lëndëve narkotike me qëllim shpërndarjeje dhe kundërshtimin e një zyrtari publik.

Ndërkohë, SAPPE ka paralajmëruar se do të paraqesë kallëzim pranë autoriteteve kompetente lidhur me situatën e personelit dhe kushtet e sigurisë në burgun e Brindisit.