Tiranë – Një moment emocional është shënuar gjatë protestës së zhvilluar në kryeqytet, ku një grua ndau publikisht historinë e saj personale, duke përcjellë një mesazh të fortë mbi emigracionin dhe largimin e shqiptarëve nga vendi.

Gjatë fjalës së mbajtur në foltore, protestuesja tregoi se jeta larg Shqipërisë i kishte mohuar mundësinë për t’u dhënë lamtumirën e fundit prindërve të saj.

Mes emocionesh, ajo rrëfeu se kur u kthye në atdhe nuk arriti ta gjente gjallë babanë, ndërsa më vonë përjetoi të njëjtën dhimbje edhe me humbjen e nënës.

“Nuk mundemi më të jetojmë larg vendit tonë. Jam vajza e një aktori. Kur erdha nuk e gjeta babain gjallë, e putha të vdekur. Edhe nënën e gjeta të vdekur”, tha ajo para të pranishmëve.

Në vijim të fjalës së saj, protestuesja bëri thirrje për më shumë angazhim dhe shpresë për të ardhmen e Shqipërisë, duke theksuar se shqiptarët duhet të kontribuojnë për vendin e tyre.

“Të gjithë do të vijmë për këtë vend. Për çfarë na duhet Europa, kur kemi Europën tonë?”, u shpreh ajo, mes duartrokitjeve të pjesëmarrësve.

Deklarata e saj u prit me emocione nga të pranishmit, duke u kthyer në një nga momentet më të komentuara të protestës.