Itali – Vdekja tragjike e 21-vjeçarit shqiptar Samir Fermaca në Itali po hetohet tashmë në një tjetër drejtim, pas shfaqjes së një dëshmie të re që ngre pikëpyetje mbi dinamikën e aksidentit fatal.

Ngjarja ndodhi mëngjesin e 13 qershorit në një rrugë rrethore, ku i riu udhëtonte si pasagjer në një motor të drejtuar nga kushëriri i tij 26-vjeçar.

Sipas rindërtimit fillestar të ngjarjes, dy të rinjtë po lëviznin në drejtim të autostradës A4 pasi ishin nisur nga semafori i Campagnola-s. Gjatë rrugës, ata u parakaluan nga një automjet tip SUV Audi, drejtuesi i të cilit, sipas hetimeve paraprake, u kishte prerë lehtë rrugën gjatë rikthimit në korsi.

Ky veprim shkaktoi reagimin e drejtuesit të motorit, i cili e parakaloi automjetin nga e djathta. Në momentin kur mjeti dhe motori po lëviznin paralelisht, 21-vjeçari dyshohet se goditi me këmbë pasqyrën e SUV-it, duke bërë që motori të humbiste ekuilibrin.

Si pasojë e rrëzimit, Samir Fermaca përfundoi në asfalt pa ndjenja, ndërsa kushëriri i tij shpëtoi pa lëndime serioze.

Megjithatë, hetimet kanë marrë një kthesë të re pas dëshmisë së një personi që po udhëtonte pas tyre në momentin e aksidentit. Sipas tij, një automjet i dytë kaloi shumë pranë të riut ndërsa ai ndodhej i shtrirë në rrugë, duke ngritur dyshime se mund të ketë pasur një përplasje ose kontakt që nuk ishte evidentuar më parë.

Për këtë arsye, prokurorja e çështjes, Giulia Angeleri, ka urdhëruar kryerjen e autopsisë për të përcaktuar me saktësi shkakun e vdekjes dhe për të verifikuar nëse automjeti i dytë ka luajtur ndonjë rol në ngjarjen tragjike.

Autoritetet italiane pritet të hedhin më shumë dritë mbi rrethanat e aksidentit pas përfundimit të ekspertizës mjeko-ligjore. Ndërkohë, autopsia do të kryhet me procedura sa më pak invazive, për të bërë të mundur edhe dhurimin e organeve të viktimës.