Tiranë – Protesta e qytetarëve ka vijuar për të 19-ën ditë radhazi, ndërsa këtë të enjte tubuesit u mblodhën pranë godinës së Kuvendit të Shqipërisë gjatë zhvillimit të seancës plenare.

Protestuesit u pozicionuan pranë hyrjes kryesore të Kuvendit, duke penguar kalimin e deputetëve të mazhorancës dhe duke kërkuar dorëheqjen e kryeministrit Edi Rama.

Për shkak të situatës së krijuar, shumica e deputetëve socialistë janë larguar nga godina përmes hyrjeve alternative, duke shmangur kontaktin e drejtpërdrejtë me protestuesit. Të njëjtën rrugë ka ndjekur edhe kryeministri Edi Rama, i cili është larguar nga Kuvendi përmes një daljeje tjetër, larg hyrjes kryesore ku ishte përqendruar protesta.

Ndërkohë, deputeti socialist Ardit Bido zgjodhi të mos largohej menjëherë nga zona, duke u përballur me protestuesit që e rrethuan dhe i drejtuan akuza e thirrje kundërshtuese. Situata u tensionua pas afrimit të disa personave pranë deputetit, çka solli ndërhyrjen e forcave të policisë.

Efektivët krijuan një kordon sigurie dhe shoqëruan Bidon larg turmës, ndërsa një protestues u neutralizua pasi tentoi të ndiqte policët gjatë largimit të deputetit.

Protesta pranë Kuvendit u zhvillua nën masa të shtuara sigurie, ndërsa tensionet mes protestuesve dhe përfaqësuesve të mazhorancës vijojnë të mbeten të larta.