Dosja “Metamorfoza”, GJKKO dënon me 6 vite burg biznesmenin Pëllumb Gjoka

Gjykata e Posaçme Kundër Korrupsionit dhe Krimit të Organizuar ka dënuar biznesmenin Pëllumb Gjoka në kuadër të dosjes së njohur si “Metamorfoza”.

Sipas vendimit të shpallur nga GJKKO, Gjoka u dënua fillimisht me 9 vite burg. Megjithatë, për shkak se përfitoi nga gjykimi i shkurtuar, dënimi iu ul me një të tretën, duke u konvertuar në 6 vite burg.

Pëllumb Gjoka u arrestua në korrik të vitit 2023 gjatë një operacioni të SPAK, pasi nga hetimet dhe komunikimet e zbuluara në platformën e enkriptuar Sky ECC u dyshua për përfshirje në një organizatë kriminale dhe lidhje me një sërë veprash të rënda penale, përfshirë edhe ngjarje kriminale të rënda.

Në të njëjtin operacion u arrestuan edhe ish-zyrtari i lartë i Policisë së Shtetit, Oltion Bistri, ish-prokurori Xhevahir Lita, si dhe persona të tjerë, emrat e të cilëve dolën në dritë nga komunikimet e zbuluara në aplikacionin Sky ECC.

Dosja “Metamorfoza” konsiderohet një nga hetimet më të rëndësishme të SPAK-ut kundër krimit të organizuar, pasi dokumentoi komunikime dhe lidhje të dyshuara mes personazheve të botës së krimit, zyrtarëve dhe individëve të tjerë të përfshirë në aktivitete të paligjshme.