Të dhënat po ngarkohen...
Transmetuar më 18-06-2026, 17:52
Një zhvillim i ri është shënuar në hetimet për vrasjen e çiftit Kreshnik dhe Gentiana Mujeci në Balldren të Lezhës, ngjarje që tronditi opinionin publik më 26 prill 2026.
Policia e Shtetit njoftoi se, falë shkëmbimit të informacionit me autoritetet malazeze, është lokalizuar dhe arrestuar në Ulqin një person i dyshuar se ka ndihmuar autorin e krimit pas ngjarjes.
Sipas policisë, i arrestuari është shtetasi B. K., 40 vjeç, banues në fshatin Torovicë. Ai akuzohet për veprën penale “Përkrahja e autorit të krimit”, kryer në bashkëpunim.
Autoritetet shqiptare kishin siguruar informacion për vendndodhjen e tij dhe ia kishin përcjellë policisë malazeze, e cila bëri të mundur lokalizimin dhe kapjen e tij në qytetin e Ulqinit.
Menjëherë pas arrestimit, 40-vjeçari u deportua drejt Shqipërisë përmes Pikës së Kalimit Kufitar Muriqan, ku iu dorëzua Policisë Kufitare shqiptare. Më pas ai u shoqërua nga efektivët e Drejtorisë Vendore të Policisë Lezhë për vijimin e procedurave hetimore.
Hetimet për zbardhjen e plotë të vrasjes së çiftit Mujeci vijojnë, ndërsa autoritetet po punojnë për dokumentimin e rolit të secilit person të përfshirë në këtë ngjarje të rëndë.
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd