VENEZIA, 18 Qershor 2026 – Një ngjarje jashtëzakonisht e rëndë dhe makabre ka tronditur opinionin publik në Itali dhe më gjerë. Një 17-vjeçar ka masakruar me thikë tezen e tij, profesoreshën 53-vjeçare Chiara Guerra, duke tentuar më pas t’i digjte trupin dhe ta hidhte në lumë për të fshehur gjurmët e krimit. Ngjarja dyshohet se ka ndodhur në qytezën San Stino di Livenza (në provincën e Venecias), në kulmin e tensioneve familjare të lidhura me çështje trashëgimie.

Trupi i pajetë i viktimës u gjet duke lundruar në ujërat e lumit Loncon. Ekzaminimi i parë mjeko-ligjor ka zbuluar një egërsi të jashtëzakonshme: 53-vjeçarja është goditur më shumë se 20 herë me thikë, kryesisht në zonën e qafës dhe të kraharorit. Gjithashtu, rrobat e saj të djegura dhe dëmtimet në lëkurë dëshmojnë përpjekjen e dështuar të të riut për të karbonizuar kufomën përpara se ta transportonte atë.

Dinamika horror: E transportoi trupin me karrocë dore

Pas një marrjeje në pyetje prej 10 orësh nga prokurorët, adoleshenti ka pranuar autorësinë e krimit, duke rindërtuar një pjesë të skenës horror. Sipas dëshmisë së tij, ai e ka qëlluar tezen brenda një kasolleje druri pranë shtëpisë. Më pas, e ka ngarkuar trupin e pajetë në një karrocë dore, ka përshkuar disa qindra metra nëpër rrugët e qytezës pa u vënë re nga askush dhe e ka hedhur atë në kanalin Malgher.

Megjithatë, hetuesit kanë vënë re disa mospërputhje të rëndësishme mes rrëfimit të autorit dhe gjetjeve në terren. Ndërsa 17-vjeçari ka pretenduar se e ka qëlluar viktimën vetëm disa herë, mjekësia ligjore konfirmoi një numër plagësh dhjetë herë më të madh, çka pritet të rëndojë pozitën e tij penale me rrethanën cilësuese të mizorisë. Po ashtu, i riu pretendoi se e kishte futur trupin në një thes, por kufoma u gjet duke lundruar e lirë, rreth 8 kilometra më tej.

Viktima tentoi të mbrohej, arma e krimit ende nuk është gjetur

Ekspertët dyshojnë se Chiara Guerra ka luftuar deri në çastet e fundit për të shpëtuar. Në krahët dhe në fytyrën e 17-vjeçarit janë konstatuar gërvishtje të shumta të pajtueshme me shenja vetëmbrojtjeje, ndërsa i riu ka përfunduar gjithashtu me një dorë të thyer.

Deri më tani, policia nuk ka rënë ende në gjurmët e armës së krimit dhe as të telefonit celular të viktimës, pasi adoleshenti ka deklaruar se i ka hedhur të dyja në ujë.

Çështja po ndiqet zyrtarisht nga Prokuroria e të Miturve në Trieste, e cila ka ngritur ndaj 17-vjeçarit akuzat e rënda për vrasje me paramendim dhe fshehje ose asgjësim të kufomës. Hetimet e mëtejshme, përfshirë autopsia e plotë dhe analizat shkencore, pritet të përcaktojnë nëse krimi ishte i planifikuar prej kohësh apo rrodhi pas një konflikti të çastit.