TIRANË, 18 Qershor 2026 – Kryeministri Edi Rama ka hedhur poshtë pretendimet e opozitës dhe grupeve të shoqërisë civile lidhur me projektet turistike në Ishullin e Sazanit dhe në zonën e Zvërnecit. Në një intervistë dhënë për agjencinë gjermane të lajmeve "DPA" në Berlin, Rama sqaroi se deri më tani nuk ka asnjë marrëveshje përfundimtare të nënshkruar me investitorët e huaj, duke i cilësuar reagimet e javëve të fundit si të bazuara mbi dezinformata.

Sipas kreut të qeverisë shqiptare, narrativa se ishulli i është shitur investitorëve të lidhur me familjen e ish-Presidentit të SHBA-së, Donald Trump, është e rreme. Ai konfirmoi se Jared Kushner, dhëndri i Trump, është pjesë e një grupi investitorësh potencialë med të cilët po negociohet një sipërmarrje e përbashkët për ndërtimin e një resorti luksoz, por theksoi se asgjë nuk ka përfunduar.

"Faktet thonë se nuk ka marrëveshje për Ishullin e Sazanit. Janë të gjitha gënjeshtra. Shqipëria është bërë një platformë për të gjithë zemërimin anti-Trump në të gjithë botën", deklaroi Rama, duke kritikuar raportimet se ishulli është tjetërsuar. Projektet në Zvërnec dhe Sazan në pritje të vlerësimit mjedisor

Përveç Sazanit, plani i investimeve përfshin edhe një zhvillim privat në gadishullin e Zvërnecit, pranë Lagunës së Nartës, një zonë e njohur për habitatin e saj të pasur ekologjik. Kryeministri pranoi se puna paraprake eksploruese në këtë zonë është pezulluar përkohësisht për shkak të "presionit", por konfirmoi se projekti do të ecë përpara.

Rama bëri të ditur se deri më tani nuk është paraqitur asnjë aplikim zyrtar për ndërtim për asnjërin nga projektet. Ai garantoi se çdo hap do t’i nënshtrohet vlerësimeve rigoroze të ndikimit në mjedis, duke shtuar se legjislacioni aktual lejon vetëm zhvillim të kufizuar dhe të ndjeshëm ndaj natyrës.

Polemikat mbi ligjin e Zonave të Mbrojtura

I pyetur mbi kritikat e Bashkimit Evropian dhe organizatave mjedisore lidhur met ndryshimet ligjore të vitit 2024 për zonat e mbrojtura, të cilat shihen si zbutje e kritereve të mbrojtjes, Rama e hodhi poshtë këtë qëndrim.

Kryeministri këmbënguli se Shqipëria, si vend kandidat për në BE, nuk ka "asnjë shans" të miratojë projekte që bien ndesh me kriteret mjedisore të bllokut evropian, duke siguruar përputhshmëri të plotë me standardet ndërkombëtare.