FINIQ – Një aksident është regjistruar pranë zonës turistike të Syrit të Kaltër, ku dy persona, njëri prej tyre shtetas i huaj, kanë rënë me motor në një humnerë rreth 15 metra nga rruga.

Sipas informacioneve paraprake, të dy personat kanë pësuar lëndime të lehta dhe fatmirësisht ndodhen jashtë rrezikut për jetën.

Në operacionin e shpëtimit janë angazhuar forcat e Mbrojtjes nga Zjarri dhe Shpëtimi (MZSH), strukturat e Policisë së Shtetit, si dhe shërbimet e Urgjencës Mjekësore.

Pas nxjerrjes nga terreni i vështirë, të lënduarit janë transportuar drejt Spitalit të Sarandës, ku po marrin ndihmën e nevojshme mjekësore dhe po i nënshtrohen kontrolleve të mëtejshme.

Autoritetet kanë nisur punën për sqarimin e plotë të rrethanave të aksidentit.