SHBA – Një ditë historike pritet në Kupën e Botës që po zhvillohet në Shtetet e Bashkuara, Meksikë dhe Kanada, pasi për herë të parë në këtë edicion një ndeshje do të drejtohet nga një gjyqtare femër.

Takimi mes Republikës Çeke dhe Afrikës së Jugut, i vlefshëm për ditën e dytë të Grupit A dhe që luhet në stadiumin e Atlantës, do të arbitrohet nga amerikania Tori Penso, një nga emrat më të vlerësuar në gjykimin ndërkombëtar.

Penso, e lindur në Florida, ka një karrierë të rëndësishme në arenën ndërkombëtare. Në vitin 2023, ajo u përzgjodh nga FIFA për të drejtuar finalen e Kupës së Botës për Femra mes Anglisë dhe Spanjës, takim që përfundoi me triumfin e Spanjës.

Më pas, në të njëjtin vit, ajo u përfshi edhe në listën e arbitrave për Kupën e Botës për Klube në futbollin e meshkujve, duke konsoliduar më tej pozicionin e saj në elitën e gjykimit botëror.

Në këtë ndeshje historike, ajo do të ndihmohet nga bashkëkombëset e saj Brooke Mayo dhe Kathryn Nesbitt, duke krijuar një treshe arbitrimi tërësisht femërore.

Me këtë emërim, Tori Penso bëhet gjithashtu gruaja e dytë në histori që drejton një ndeshje në Kupën e Botës për meshkuj, pas francezes Stéphanie Frappart, e cila arbitroi sfidën Gjermani–Kosta Rika në Katar 2022.