BRUKSEL – Rregullat e sjelljes në stadiumet e Kupës së Botës 2026 pritet të jenë më të rrepta se më parë, duke përfshirë jo vetëm ndalimin e substancave dhe mjeteve të rrezikshme, por edhe disa forma të sjelljes publike mes tifozëve.

Sipas raportimeve të mediave ndërkombëtare, FIFA ka përfshirë në udhëzimet e saj edhe kufizime që lidhen me “shfaqjet e papërshtatshme të dashurisë”, një kategori e përgjithshme që mund të përfshijë sjellje të konsideruara të tepruara në hapësirat publike të stadiumeve.

Në këtë kuadër, përfshihen edhe raste të puthjeve të zgjatura ose tepër pasionante, ndërsa puthjet e shkurtra mbeten të lejuara. Megjithatë, organizata nuk ka përcaktuar qartë kufij të saktë për zbatimin e këtij rregulli, duke i lënë stafit të stadiumeve diskrecion në vlerësimin e situatave konkrete.

Sipas burimeve të cituara nga media gjermane “Bild”, tifozët do të njoftohen përmes altoparlantëve për sjelljet e ndaluara, të cilat përfshijnë gjithashtu fyerjet, pirjen e duhanit, përdorimin e substancave, gjestet ofenduese dhe baste të paligjshme.

Edhe pse deri më tani nuk janë raportuar raste ndëshkimesh për sjellje të tilla, rregullat e reja synojnë të rrisin kontrollin dhe standardet e sjelljes në ambientet sportive.

Në listën e ndalesave përfshihen gjithashtu disa sende të pazakonta, si mielli, letra higjienike, tullumbacet dhe flamujt që tejkalojnë përmasat e lejuara nga rregulloret e FIFA-s.