BRUKSEL – Parlamenti Evropian ka miratuar rregulloren e re mbi riatdhesimet e emigrantëve, një nismë që synon përshpejtimin e kthimit të personave pa të drejtë qëndrimi në Bashkimin Evropian dhe forcimin e menaxhimit të flukseve migratore.

Pas miratimit, kryeministrja e Italisë, Giorgia Meloni, e ka cilësuar vendimin si një “sukses të madh” për Italinë dhe për politikën evropiane të migracionit. Në një reagim në platformën “X”, ajo theksoi se bëhet fjalë për një masë me karakter historik, e cila synon rritjen e efikasitetit në procesin e riatdhesimeve.

Sipas saj, rregullorja e re parashikon gjithashtu mundësinë e krijimit të qendrave të riatdhesimit në vende të treta, duke e konsideruar këtë qasje si vazhdimësi të modelit të aplikuar nga Italia në bashkëpunim me Shqipërinë.

Meloni deklaroi se kjo qasje, e cila më parë ka hasur kundërshtime politike, tashmë është shndërruar në një instrument të përdorshëm në nivel të Bashkimit Evropian.

Ajo theksoi se objektivi i politikës së re është menaxhimi më i rregullt dhe më efektiv i migracionit, forcimi i kontrollit të kufijve dhe përshpejtimi i kthimit të personave që nuk përmbushin kriteret për qëndrim në vendet anëtare.

Në një reagim të dytë, Meloni nënvizoi se Italia po forcon më tej instrumentet e saj në këtë fushë, duke e përshkruar qasjen e re si më të “serioze, të rregullt dhe efikase”.

Ajo shtoi se qeveria italiane do të vijojë të ndjekë këtë linjë politike, duke e konsideruar menaxhimin e migracionit si një nga prioritetet kryesore të agjendës kombëtare dhe evropiane.