Kapen 19 mijë euro të padeklaruara në Portin e Durrësit, po transportoheshin drejt Italisë

Një shumë prej 19 mijë eurosh të padeklaruara është sekuestruar nga autoritetet doganore në Portin e Durrësit gjatë kontrolleve të ushtruara në dalje të territorit shqiptar.

Sipas njoftimit zyrtar, operacioni është zhvilluar nga Dogana Durrës në bashkëpunim me Policinë Kufitare, në kuadër të masave të shtuara për parandalimin dhe goditjen e shkeljeve doganore.

Kontrolli është kryer mbrëmjen e së martës, përpara imbarkimit në tragetin e linjës Durrës–Bari. Gjatë verifikimeve, shërbimet doganore konstatuan dhe sekuestruan 19 mijë euro që nuk ishin deklaruar sipas detyrimeve ligjore.

Rasti është referuar pranë organeve kompetente për veprime të mëtejshme procedurale dhe hetimore.

Autoritetet bëjnë me dije se kontrollet në Portin e Durrësit do të vijojnë pa ndërprerje, me qëllim garantimin e zbatimit të legjislacionit doganor dhe parandalimin e çdo tentative për transport të paligjshëm të parave apo mallrave përtej kufirit. /noa.al