Athinë, 17 Qershor 2026 – Një grup i strukturuar kriminal, i cili merrej me trafikimin dhe tregtimin e kokainës në zona të ndryshme të Athinës, është shkatërruar pas një operacioni të gjerë të ndërmarrë nga Nëndrejtoria e Prokurorisë dhe Hetimit të Krimit në kryeqytetin grek. Gjatë këtij aksioni të koduar, autoritetet kanë vënë në pranga nëntë persona dhe kanë shpallur në kërkim katër anëtarë të tjerë të rrjetit, ku pjesa dërrmuese e të përfshirëve janë shtetas shqiptarë. Mbi të dyshuarit rëndojnë akuzat për krijim të organizatës kriminale, shkelje të ligjit për armët dhe substancat narkotike, pastrim parash, si dhe falsifikim të dokumenteve dhe shkelje të ligjit për të huajt.

Sipas dokumentacionit hetimor, ky rrjet kriminal kishte një strukturë të qartë hierarkike dhe vepronte në mënyrë të pandërprerë të paktën që nga dhjetori i vitit 2025. Organizata drejtohej nga një udhëheqës dhe tre zëvendësudhëheqës, ndërsa anëtarët zbatonin masa të rrepta sigurie për t’i shpëtuar mbikëqyrjes policore. Ata komunikonin përmes aplikacioneve të koduara, përdornin terminologji specifike për produktet narkotike dhe ndryshonin në mënyrë të shpeshtë kartat dhe lidhjet telefonike. Rolin e kryesuesit të rrjetit e ushtronte 39-vjeçari Ervin Ademi, i cili koordinonte të gjithë strategjinë operative, menaxhonte financat dhe mbikëqyrte tre zëvendësit e tij, të cilët më pas shpërndanin detyrat dhe sasitë e kokainës te korrierët dhe klientët fundorë.

Të arrestuarit nga ky operacion janë identifikuar si Ervin Ademi (alias Leo, 39 vjeç), Elton Plepi (alias Toni, 42 vjeç), Ervis Tringa (alias Niko, 38 vjeç), Albert Pali (alias Berti, 42 vjeç), Bruno Anastasaj (alias Thodhori), Kondelina Dhimertika (43 vjeç), Xhulio Kercani (29 vjeç) dhe Malena Alushaj (24 vjeç). Ndërkaq, autoritetet greke kanë shpallur në kërkim policor shtetasit Helis Cato (38 vjeç), Taulant Prifti (47 vjeç) dhe Erald Gjata (46 vjeç), të cilët dyshohet se janë larguar për t’i shpëtuar arrestimit.

Gjatë kontrolleve të imtësishme të ushtruara në banesat dhe bazat sekrete të grupit, të cilat përdoreshin si magazina dhe strehëza, policia sekuestroi në cilësinë e provës materiale 827 gramë kokainë, një sasi të vogël marijuane, tri pistoleta, karikatorë dhe 119 fishekë luftarakë. Gjithashtu u bllokuan pesë automjete që shërbenin për transportin e drogës, 14.505 euro, 470 dollarë amerikanë, tri radiomarrëse, shtatë peshore elektronike precizioni, si dhe armë të ftohta si thika, një shkop dhe spraj piper. Nga llogaritjet paraprake të ekspertëve financiarë, përfitimi i paligjshëm ekonomik që ky grup ka gjeneruar nga aktiviteti i shitjes së lëndëve narkotike përllogaritet në mbi 900.000 euro.