KANSAS, SHBA – Argjentina, kampione e botës në fuqi, e nisi me fitore të thellë Kupën e Botës 2026, duke mposhtur 3-0 Algjerinë në ndeshjen e Grupit J. Protagonist absolut i sfidës ishte Lionel Messi, i cili realizoi të tre golat e takimit.

Ndeshja nisi me ritëm të lartë, ku Argjentina krijoi raste të menjëhershme. Një gol i Messit u anulua nga VAR për pozicion jashtë loje, ndërsa edhe Algjeria iu afrua avantazhit me një gol të anuluar në minutat e para.

Zhbllokimi erdhi në minutën e 17-të, kur Messi përfitoi nga një asist i Rodrigo de Paul dhe me një goditje të fuqishme nga jashtë zone kaloi Argjentinën në avantazh.

Në pjesën e dytë, kampionët në fuqi kontrolluan lojën, ndërsa Algjeria krijoi disa kundërsulme të rrezikshme. Messi realizoi golin e dytë në minutën e 60-të pas një goditjeje nga distanca, ndërsa kompletoi tripletën në minutën e 76-të pas asistit të Gonzales.

Me këtë paraqitje, Messi konfirmoi edhe një herë statusin e tij si një nga figurat më të mëdha të historisë së Kupës së Botës. Ai ka tani 16 gola në turne finale, duke barazuar rekordin e Miroslav Klose dhe duke hyrë në garë për vendin e parë në historinë e kompeticionit.

Në këtë ndeshje, Messi regjistroi gjithashtu paraqitjen e tij të gjashtë në një Kupë Bote, një rekord unik në futbollin botëror. Ai numëron 27 ndeshje në Botërorë dhe 8 asiste përveç golave të shënuar.

Argjentina merr kryesimin e Grupit J me 3 pikë, ndërsa Algjeria mbetet pa pikë. Në ndeshjen tjetër të grupit përballen Austria dhe Jordania.