Eurodeputetja italiane Ilaria Salis ka bërë thirrje që Bashkimi Evropian të monitorojë më nga afër situatën politike dhe sociale në Shqipëri, duke e konsideruar zhvillimet aktuale më të gjera se thjesht protesta mjedisore.

Në deklaratën e saj, ajo tha se protestat në Shqipëri nuk përfaqësojnë vetëm çështje ambientale, por sipas saj lidhen edhe me sovranitetin popullor, përfaqësimin politik dhe ndikimin e interesave ekonomike në vendimmarrje.

Salis u shpreh se qytetarët shqiptarë kanë përcjellë mesazhin se “Shqipëria nuk është në shitje”, duke kritikuar atë që e quajti ndikim të oligarkëve dhe spekulantëve në vend.

Ajo përmendi gjithashtu emra publikë si Ivanka Trump dhe Jared Kushner, në kontekstin e debatit për investime në Shqipëri, duke theksuar se as toka, as natyra dhe as demokracia nuk duhet të jenë objekt tregtimi.

Sipas saj, lëvizjet qytetare në Shqipëri përfaqësojnë një reagim më të gjerë ndaj pabarazive dhe vendimmarrjes së ndikuar nga interesat ekonomike, ndërsa i bëri thirrje BE-së që ta trajtojë këtë situatë me vëmendje të shtuar.