Grumbullimi i akullit në frigorifer është një problem i zakonshëm në shumë familje, i cili shpesh shkaktohet nga lagështia që depërton në pajisje dhe nga mënyra e papërshtatshme e ruajtjes së ushqimeve. Ky fenomen, edhe pse shpesh neglizhohet, ndikon drejtpërdrejt në uljen e efikasitetit të pajisjes dhe rritjen e konsumit të energjisë elektrike.

Ekspertët theksojnë se një frigorifer i mbuluar me shtresa akulli detyrohet të punojë më shumë për të ruajtur temperaturën e duhur, duke çuar kështu në rritje të faturës së energjisë.

Për të parandaluar këtë problem, rekomandohet që ushqimet të ruhen gjithmonë të mbyllura mirë në enë ose qese hermetike, në mënyrë që të reduktohet hyrja e lagështisë në brendësi të pajisjes.

Në rast se akulli është formuar tashmë, hapi i parë është shkrirja e plotë e ngrirësit dhe pastrimi i kujdesshëm i sipërfaqeve të brendshme. Pas procesit të shkrirjes, është e rëndësishme që pajisja të thahet plotësisht për të shmangur rikrijimin e akullit.

Një nga këshillat praktike që rekomandohet nga specialistët është shmangia e hapjes së shpeshtë të derës së ngrirësit, pasi futja e ajrit të ngrohtë favorizon kondensimin dhe formimin e akullit. Po ashtu, frigoriferi nuk duhet të mbipopullohet, në mënyrë që ajri të qarkullojë lirshëm brenda tij.

Mirëmbajtja e rregullt dhe përdorimi korrekt i frigoriferit ndihmojnë në reduktimin e akullit, zgjatjen e jetëgjatësisë së pajisjes dhe uljen e konsumit të energjisë elektrike.