Trajneri spanjoll Roberto Martínez pritet të mos rinovojë kontratën e tij me përfaqësuesen e Portugalisë, e cila skadon në fund të muajit korrik të këtij viti, sipas raportimeve të mediave ndërkombëtare.

Pavarësisht ecurisë së ekipit dhe rezultateve të arritura gjatë periudhës së tij në drejtim, raportohet se 52-vjeçari do të mbyllë ciklin trevjeçar në krye të “luzitanëve”, pas përfundimit të Kupës së Botës në Amerikën e Veriut.

Sipas burimeve, Martínez po shqyrton opsionet për të ardhmen e tij profesionale, përfshirë rikthimin në Premier League, një tjetër kampionat europian ose drejtimin e një përfaqësueseje tjetër kombëtare.

Ndërkohë, Portugalia ka nisur përgatitjet për Botërorin, ku në ndeshjen e parë do të përballet me Republikën Demokratike të Kongos. Vëmendja mbetet e përqendruar te kapiteni Cristiano Ronaldo, për të cilin ky turne mund të jetë një nga shanset e fundit për të fituar trofeun e vetëm madhor që i mungon në karrierë, Kupën e Botës.

Skuadra portugeze vjen me pritshmëri të larta, e përforcuar nga emra si Bruno Fernandes dhe Vitinha, dhe konsiderohet ndër pretendentet për fitimin e turneut.

Gjatë drejtimit të Martínez, Portugalia ka regjistruar një ecuri pozitive, përfshirë një përqindje të lartë fitoresh dhe triumfin në Ligën e Kombeve në vitin 2025.