Një incident i rëndë ka ndodhur në Shkup, ku disa automjete diplomatike pranë Ambasadës së Bullgarisë janë përfshirë nga flakët në atë që autoritetet e konsiderojnë një akt të qëllimshëm zjarrvënieje.

Sipas autoriteteve të Maqedonisë së Veriut, është arrestuar një 44-vjeçar nga Shkupi, i identifikuar përmes kamerave të sigurisë teksa dyshohet se ka hedhur lëndë djegëse mbi automjetet diplomatike dhe më pas u ka vënë flakën.

Ngjarja ka shkaktuar reagime të menjëhershme në të dyja vendet. Qeveria e Maqedonisë së Veriut e dënoi ashpër sulmin, duke e cilësuar atë një akt vandalizmi që cenon sigurinë publike, marrëdhëniet diplomatike dhe normat e së drejtës ndërkombëtare.

Në reagimin zyrtar, autoritetet maqedonase deklaruan se nuk do të tolerojnë veprime që synojnë nxitjen e urrejtjes, tensioneve apo destabilizimin e marrëdhënieve ndërshtetërore, duke paralajmëruar ndëshkim të autorëve sipas ligjit.

Edhe Ministria e Punëve të Jashtme e Bullgarisë reagoi ashpër, duke e cilësuar ngjarjen si një “akt të hapur agresioni” ndaj përfaqësisë diplomatike bullgare në Shkup. Sipas Sofjes zyrtare, sulmi vuri në rrezik sigurinë e stafit diplomatik, ndërsa dëme më të mëdha u shmangën falë ndërhyrjes së menjëhershme të konsullit bullgar, i cili përdori një fikës zjarri për të neutralizuar flakët.

Diplomacia bullgare e lidhi incidentin me klimën e tensionuar politike dhe retorikën anti-bullgare që, sipas saj, vazhdon të shfaqet në Maqedoninë e Veriut, duke kërkuar reagim më të fortë institucional ndaj rasteve të ngjashme.

Ngjarja pritet të ndikojë në marrëdhëniet mes Shkupit dhe Sofjes, të cilat prej vitesh shoqërohen nga mosmarrëveshje historike, identitare dhe politike. Ndërkohë, autoritetet maqedonase kanë nisur hetimet për të zbardhur motivet e plota të sulmit dhe për të përcaktuar nëse bëhet fjalë për një akt individual apo për një veprim me prapavijë më të gjerë.