Një operacion i gjerë i koordinuar nga Prokuroria e Tiranës është zhvilluar këtë të martë kundër dy call center-ave të dyshuar se përdoreshin për mashtrimin e qytetarëve të vendeve europiane.

Aksioni, i realizuar në bashkëpunim me autoritetet austriake, është përqendruar në dy ambiente pranë zonës së Liqenit të Thatë në kryeqytet, ku dyshohet se ushtrohej aktiviteti i paligjshëm.

Gjatë kontrolleve të ushtruara nga grupet hetimore janë sekuestruar pajisje kompjuterike dhe materiale të tjera që dyshohet se përdoreshin për kryerjen e mashtrimeve, ndërsa në ambientet e call center-ave janë gjetur edhe operatorë në proces pune.

Sipas të dhënave paraprake, skema e dyshuar kishte në shënjestër qytetarë të vendeve të ndryshme europiane, të cilëve u merreshin shuma të konsiderueshme parash përmes metodave mashtruese.

Hetimet vijojnë për dokumentimin e plotë të aktivitetit kriminal, identifikimin e personave të përfshirë dhe përcaktimin e dëmit të shkaktuar. Autoritetet pritet të japin më shumë detaje mbi operacionin në orët në vijim.