Tiranë, 16 Qershor 2026 — Gjykata e Posaçme kundër Korrupsionit dhe Krimit të Organizuar (GJKKO) ka lënë në fuqi masën e sigurisë “Arrest në burg” për Moisi Habilajn, i cili u arrestua pak ditë më parë në Borsh pas një periudhe të gjatë në arrati. Gjatë seancës për verifikimin e masës së sigurisë, Habilaj ka zgjedhur të mbajë një qëndrim mohues duke kyçur gojën dhe duke mos iu përgjigjur asnjë prej pyetjeve të drejtuara nga trupi gjykues.

Masa e sigurisë e konfirmuar sot daton që prej 26 dhjetorit të vitit 2018, kohë kur ish-Gjykata e Krimeve të Rënda kishte caktuar ndaj tij arrestin në burg në mungesë. Habilaj akuzohet për veprat penale “Prodhimi dhe shitja e narkotikëve”, “Trafikimi i lëndëve narkotike”, të kryera në kuadër të "Grupit të strukturuar kriminal".

Kujtojmë se më 23 janar të këtij viti, Gjykata e Posaçme e shpalli fajtor Moisi Habilajn në mungesë, duke e dënuar përfundimisht me 10 vite burgim për rolin e tij udhëheqës në rrjetin e trafikut të drogës. Përveç dënimit në Shqipëri, Habilaj rezulton i dënuar edhe nga drejtësia italiane me mbi 12 vite burgim, nën akuzën e pjesëmarrjes në një organizatë kriminale të armatosur që operonte në trafikun e lëndëve narkotike mes Shqipërisë dhe Italisë. Pas ekzekutimit të masës në terren, Habilaj do të vuajë dënimin e dhënë nga drejtësia shqiptare.