Tiranë, 16 Qershor 2026 — Gjykata e Posaçme kundër Korrupsionit dhe Krimit të Organizuar (GJKKO) ka rrëzuar të pesë kërkesat e paraqitura nga mbrojtja e kryebashkiakut të Tiranës, Erion Veliaj, në seancën e sotme gjyqësore.

Trupi gjykues vendosi të refuzojë kërkesën për transmetimin "live" të procesit në media, duke e konsideruar atë një kërkesë të përsëritur dhe duke sqaruar se statusi publik i seancës nuk nënkupton detyrimisht transmetim të drejtpërdrejtë. Po ashtu, u rrëzua edhe kërkesa për nxjerrjen e të pandehurit nga ambienti i ndarë me xham mbrojtës, me argumentin se kjo strukturë nuk cenon të drejtat procedurale të tij dhe i shërben mbarëvajtjes e sigurisë së procesit.

Gjykata nuk pranoi as kërkesën për rritjen e shpeshtësisë së seancave në më shumë se një herë në javë, si dhe kërkesat që lidheshin me shqyrtimin e provave digjitale, për të cilat u saktësua se ka një vendimmarrje të mëparshme.

Në të njëjtën kohë, trupi gjykues njoftoi se janë pezulluar afatet e paraburgimit për Erion Veliajn. Për shkak të një kërkese të paraqitur nga mbrojtja e të pandehurës tjetër në këtë proces, Ajola Xoxa, gjykata vendosi ta shtyjë seancën e radhës për datën 23 qershor 2026, në orën 10:00.