Tiranë, 16 Qershor 2026 — Drejtoresha e Operatorit të Blerjeve të Përqendruara (OBP), Arlinda Pogaj, ka njoftuar zyrtarisht largimin nga drejtimi i këtij institucioni.

Përmes një deklarate publike, Pogaj e ka konsideruar përfundimin e kësaj detyre si mbylljen e një kapitulli mjaft të rëndësishëm në jetën e saj profesionale, duke u shprehur se institucioni u ndërtua dhe u konsolidua nga e para gjatë mandatit të saj.

Gjatë bilancit të prezantuar, Pogaj tha se nën drejtimin e saj OBP arriti të kryejë 1,649 procedura prokurimi, duke gjeneruar rreth 42 milionë euro kursime për buxhetin e shtetit. Institucioni u ka shërbyer 242 autoriteteve kontraktore publike, duke përfshirë spitalet, qendrat sociale, strukturat e ushtrisë, të policisë dhe institucionet e ekzekutimit të vendimeve penale.

Sipas saj, përtej shifrave, arritja më e madhe e mandatit mbetet rritja e transparencës, konkurrencës dhe standardizimi i proceseve të blerjeve publike.

Nuk dihet arsyeja përse Edi Rama e largoi Pogajn dhe nuk dihet as kush do ta zëvendësojë atë.