Tiranë, 16 Qershor 2026 — Qytetarët dhe bizneset shqiptare kanë kursyer rreth 84 milionë euro që nga nisja e procesit të rivlerësimit të pasurive të paluajtshme në muajin shkurt të këtij viti. Shifra është bërë publike nga administrata tatimore, e cila nënvizon se ky kursim ka ardhur si pasojë e aplikimit të shkallës së reduktuar tatimore prej 5%, nga 15% që është norma e zakonshme për transaksionet e pronave.

Sipas legjislacionit në fuqi, nga ky proces përfitojnë si individët që synojnë të shesin një pasuri të paluajtshme, ashtu edhe ata që e kanë pasur pronën të regjistruar me një vlerë më të ulët se ajo e tregut.

Përllogaritja e detyrimit të ri fiskal bëhet mbi diferencën mes vlerës së mëparshme të regjistruar dhe vlerës së re të tregut ose të shitjes, duke aplikuar tarifën e favorshme prej 5%. Drejtoria e Përgjithshme e Tatimeve ka kujtuar se afati ligjor për të përfituar nga kjo mundësi përfundon më 31 Dhjetor 2026.

Shembull rivlerësimi:

Nëse keni një banesë e cila aktualisht e ka vlerën zyrtarisht 12 milionë lekë dhe me rivlerësimin ka shkuar 20 milionë lekë, gjatë këtij viti mund ta rivlerësoni duke paguar 400 mijë lekë ose 5 për qind. Në rast shitjeje pas 2026, rivlerësimi çmohet me 15 për qind dhe kushton 1.2 milionë lekë.

Çfarë sjell ndryshe rivlerësimi 2026?

Afate të detajuara: Aplikimet për rivlerësim do të pranohen nga data 22 janar 2026 deri më 31 dhjetor 2026. Kërkesat e paraqitura brenda kësaj periudhe, për të cilat është kryer pagesa e tatimit por nuk janë përpunuar ende nga ASHK, do të mund të finalizohen administrativisht deri më 31 mars 2027.

Tatimi unik 5%: Çdo pronar apo biznes që zgjedh të përditësojë vlerën e pasurisë së paluajtshme sipas tregut, do të përfitojë nga norma e reduktuar tatimore, vetëm 5% mbi diferencën mes vlerës së re dhe asaj të regjistruar. Kjo normë zëvendëson normat më të larta të viteve të kaluara (15%) dhe programet e mëparshme të përkohshme (3%).

Të dhënat zyrtare të Agjencisë Shtetërore të Kadastrës (ASHK), të vëna në dispozicion për periudhën nga 2 shkurt deri më 27 prill 2026, tregojnë se në total kanë aplikuar 9,532 qytetarë. Megjithatë, deri më tani, taksa e reduktuar është likuiduar nga vetëm 22% e aplikuesve, ose 2,114 prej tyre, duke arkëtuar në buxhetin e shtetit një vlerë prej 1.59 miliardë lekësh. Pjesa tjetër e aplikimeve, rreth 53% ose 5,053 raste, rezultojnë të përllogaritura nga ASHK por ende të papaguara nga qytetarët, ndërsa 25% e totalit (2,365 aplikime) janë refuzuar.

Sa i përket shtrirjes gjeografike, interesi më i lartë për rivlerësimin e pronave mbetet i përqendruar në zonat bregdetare dhe në qendrat e mëdha urbane. Kryeqyteti udhëheq me 42% të totalit të aplikimeve në shkallë vendi. Pas Tiranës, numrin më të madh të kërkesave e mban rajoni Durrës, Kavajë dhe Krujë me 18%, i ndjekur nga Vlora me 6%, Lezha me 4.5%, si dhe Saranda e Fieri me nga 4% secili.