16 Qershor 2026

Shporta e konsumit ka pësuar lëvizje të ndjeshme gjatë muajit prill, me rritje të forta të çmimeve për produktet e freskëta dhe karburantet, ndërsa disa artikuj bazë ushqimorë kanë shënuar ulje. Të dhënat e publikuara nga INSTAT tregojnë se faktorë si kushtet klimatike, luhatjet në prodhim dhe import, si dhe zhvillimet në tregjet ndërkombëtare, kanë ndikuar drejtpërdrejt në çmimet e konsumit.

Produkti që ka shënuar rritjen më të madhe është limoni, çmimi i të cilit është rritur me 41.6% krahasuar me të njëjtën periudhë të një viti më parë. Në prill 2026, limoni u tregtua mesatarisht me 212.4 lekë për kilogram, nga 150 lekë që ishte në prill 2025.

Pas tij renditet domatja, e cila u shtrenjtua me 20.1%, duke arritur në 210.4 lekë për kilogram. Rritja lidhet kryesisht me dëmet e shkaktuara nga ngricat dhe përmbytjet e pranverës, që kanë ndikuar në prodhimin vendas.

Në grupin e produkteve industriale, nafta regjistroi një rritje prej 18.6%, ose 32.2 lekë më shumë për litër krahasuar me një vit më parë. Çmimi mesatar i një litri naftë arriti në 205.7 lekë, ndërsa rritje me 17.3% shënuan edhe lëndët e tjera djegëse. Sipas analizave të tregut, kjo lëvizje është ndikuar nga tensionet dhe konflikti në Iran, që kanë reflektuar rritje të çmimeve të karburanteve në tregjet ndërkombëtare.

Ndërkohë, kafeja e bluar u shtrenjtua me 12%, duke arritur në 162.3 lekë për paketim 100-gramësh, ndërsa çmimi i verës u rrit me 11%.

Nga ana tjetër, disa produkte kanë regjistruar ulje të ndjeshme të çmimeve. Konservat kryesojnë listën me një rënie prej 18.8%, duke u tregtuar mesatarisht me 168.4 lekë. Sheqeri u ul me 19.6%, duke zbritur në 89.8 lekë për kilogram nga 111.7 lekë një vit më parë.

Patatja ka pësuar gjithashtu rënie të ndjeshme prej 18.9%, duke arritur në 83.5 lekë për kilogram. Ekspertët e lidhin këtë zhvillim me mbiprodhimin në tregjet europiane. Në të njëjtën linjë, qepët e thata janë ulur me 13.5%, duke u tregtuar me 81.3 lekë për kilogram.

Ndërkohë, produktet bazë si buka, mielli dhe makaronat kanë mbetur relativisht të qëndrueshme, me luhatje minimale të çmimeve. Edhe sektori i bulmetit ka shfaqur stabilitet, ku qumështi ka regjistruar një rritje të lehtë prej 0.4%, ndërsa gjiza dhe kosi natyral kanë shënuar rritje më të moderuara.

Sipas të dhënave të INSTAT, produktet e mishit nuk kanë pësuar ndryshime të rëndësishme gjatë kësaj periudhe, duke ruajtur nivele të qëndrueshme çmimesh në treg.