TEL AVIV – Kryeministri izraelit Benjamin Netanyahu ka reaguar pas njoftimit për një marrëveshje mes SHBA-së dhe Iranit për përfundimin e konfliktit në Lindjen e Mesme, duke mbajtur një qëndrim të fortë kundërshtues ndaj programit bërthamor iranian.

Në një konferencë për shtyp, Netanyahu deklaroi se, pavarësisht marrëveshjeve apo zhvillimeve diplomatike, Irani nuk do të lejohet të pajiset me armë bërthamore.

“Me marrëveshje apo pa marrëveshje, Irani nuk do të ketë armë bërthamore as sot, as nesër. Sa kohë që unë jam kryeministër i Izraelit, kjo nuk do të ndodhë”, u shpreh ai, duke theksuar se ky qëllim përbën, sipas tij, “misionin e jetës”.

Netanyahu mbrojti gjithashtu veprimet ushtarake të Izraelit, duke deklaruar se gjatë konfliktit janë goditur objektiva të rëndësishëm të infrastrukturës ushtarake iraniane, përfshirë kapacitete bërthamore dhe raketore, si dhe struktura të forcave të armatosura.

Ai shtoi se operacionet kanë sjellë, sipas vlerësimeve të tij, dëme të mëdha ekonomike për Iranin dhe kanë ndikuar në dobësimin e kapaciteteve të tij ushtarake.

Kryeministri izraelit konfirmoi gjithashtu vijimin e pranisë ushtarake në disa zona të konsideruara strategjike në rajon, përfshirë Gazën, Libanin dhe Sirinë, ndërsa paralajmëroi se operacionet mund të zgjerohen edhe në Jemen dhe Bregun Perëndimor.

Në fund, Netanyahu njoftoi një rritje të konsiderueshme të buxhetit të mbrojtjes, i cili do të përdoret për zhvillimin e teknologjive të reja ushtarake dhe forcimin e sigurisë kombëtare të Izraelit.