TIRANË – Dhjetëra qytetarë janë mbledhur në protestë dhe kanë marshuar drejt godinës së Kryeministrisë, duke kërkuar dorëheqjen e kryeministrit Edi Rama.

Gjatë tubimit, protestuesit kanë mbajtur pankarta dhe flamuj, ndërsa kanë artikuluar thirrje kundër qeverisë. Mes sloganeve më të dëgjuara kanë qenë kërkesat për dorëheqjen e kreut të qeverisë, si dhe thirrje të tjera me përmbajtje politike.

Pjesëmarrësit kanë shprehur pakënaqësitë e tyre lidhur me qeverisjen, duke kërkuar ndryshime në drejtimin e vendit. Situata gjatë marshimit është zhvilluar nën vëzhgimin e forcave të rendit, ndërsa nuk raportohen incidente.

Sipas organizatorëve, protesta dhe tubime janë zhvilluar edhe në disa qytete të tjera të vendit, përfshirë Vlorën, Pogradecin, Durrësin dhe Shkodrën, ku qytetarët kanë shprehur qëndrimet e tyre përmes manifestimeve publike.

Mbështetje për protestën është raportuar edhe nga komunitetet shqiptare jashtë vendit, me tubime të organizuara në disa shtete, përfshirë Gjermaninë dhe Shtetet e Bashkuara të Amerikës.