Një ngjarje tragjike është shënuar pasditen e kësaj të diele në Liqenin e Ulzës, ku një i ri dyshohet se ka humbur jetën gjatë lundrimit me motor uji.

Sipas informacioneve paraprake, ngjarja ka ndodhur pak minuta më parë, ndërsa në vendngjarje kanë mbërritur menjëherë shërbimet e Policisë dhe grupi hetimor për të kryer veprimet procedurale dhe për të zbardhur rrethanat e plota të incidentit.

Burime paraprake bëjnë me dije se drejt zonës është nisur edhe Kryeprokurori i Dibrës, Abaz Muça, i cili do të ndjekë nga afër hetimet për këtë ngjarje të rëndë.

Deri në këto momente nuk është bërë i ditur identiteti i viktimës, ndërsa mbetet ende e paqartë nëse ai ishte turist apo banor i zonës.

Autoritetet vijojnë verifikimet dhe hetimet për të përcaktuar shkaqet e ngjarjes, ndërsa pritet një reagim zyrtar me detaje të mëtejshme.

Liqeni i Ulzës konsiderohet një nga destinacionet më të frekuentuara për aktivitetet ujore gjatë sezonit veror, duke tërhequr çdo vit vizitorë të shumtë nga vendi dhe jashtë tij.