IGUMENICË, 15 qershor 2026 – Autoritetet greke kanë sekuestruar një tjetër sasi të konsiderueshme lënde narkotike pranë kufirit greko-shqiptar, në një operacion të zhvilluar mëngjesin e së hënës në zonën e Igumenicës.

Sipas policisë greke, oficerët e Departamentit të Narkotikëve pranë Nëndrejtorisë së Hetimit dhe Ndjekjes Penale të Krimeve ndaluan për kontroll një automjet të marrë me qira, i drejtuar nga një grua 61-vjeçare greke me origjinë nga zona e Moskatos në Athinë.

Gjatë kontrollit të automjetit, u zbuluan dhe u sekuestruan 90 pako me rreth 96 kilogramë e 74 gramë marijuanë, 5.21 gramë kokainë, një sasi e vogël hashashi të llojit “çokollatë”, 100 euro si dhe dy telefona celularë.

Hetimet paraprake dyshojnë se lënda narkotike ishte trafikuar nga zona e Sarandës, duke kaluar përmes fshatrave të Bashkisë Konispol drejt territorit grek.

Ky është rasti i dytë i sekuestrimit të një sasie të madhe droge në zonën e Igumenicës brenda tetë ditëve. Më herët, në Nea Selefkia, autoritetet greke sekuestruan rreth 110 kilogramë marijuanë dhe arrestuan një shtetas turk, ndërsa dyshohet se ngarkesa kishte hyrë nga zona e Ciflikut në Konispol.

Për të dy rastet, policia greke ka njoftuar autoritetet shqiptare, përfshirë Komisariatin e Policisë Kufitare në Sarandë. Në vijim të bashkëpunimit mes dy vendeve, policia shqiptare ka intensifikuar kontrollet përgjatë kufirit të gjelbër dhe në zonat detare për të identifikuar personat e përfshirë në rrjetet e trafikimit.

Burime hetimore ngrenë dyshime për një riaktivizim të linjave të trafikut të drogës nga Shqipëria drejt Greqisë. Sipas të dhënave të autoriteteve, gjatë 10 muajve të fundit në rajonin e Igumenicës janë sekuestruar rreth 540 kilogramë marijuanë, ndërsa në zonat e Janinës, Kosturit dhe Selanikut sasia totale e drogës së kapur arrin në rreth 1.2 ton.

Hetimet vijojnë në të dy anët e kufirit për identifikimin dhe goditjen e rrjeteve të përfshira në trafikun ndërkombëtar të narkotikëve.