Nëna e Monika Kryemadhit refuzon pretencën e SPAK-ut dhe kërkon proces të rregullt, me pretendimin se organi i akuzës ka injoruar të ardhurat e saj të ligjshme.

Fatime Kryemadhi, e akuzuar nga Prokuroria e Posaçme për veprën penale të pastrimit të parave, ka vendosur të tërhiqet zyrtarisht nga kërkesa për gjykim të shkurtuar. Vendimi i befasishëm u komunikua këtë të hënë në Gjykatën e Posaçme kundër Korrupsionit dhe Krimit të Organizuar (GJKKO), pikërisht në momentin kur prokurorët e SPAK-ut ishin gati për të lexuar pretencën dhe për të shpallur kërkesën për dënimin e saj.

Përpara trupit gjykues, Kryemadhi ka kundërshtuar hapur vijimin e procedurës me këtë mekanizëm lehtësues, duke argumentuar se kjo formë nuk i jep mundësi për të provuar pafajësinë e saj. “Nuk dua gjykim të shkurtuar. Nuk e ndjej veten fajtore. SPAK nuk ka marrë asgjë parasysh nga të ardhurat e mia”, ka deklaruar e pandehura, duke pretenduar se hetuesit nuk kanë administruar siç duhet dokumentacionin mbi burimet e saj financiare.

Gjatë seancës, gjyqtarja e çështjes i ka sqaruar të pandehurës se aplikimi i gjykimit të shkurtuar nuk nënkupton automatikisht pranimin e fajësisë, por thjesht një procedurë ku palët bien dakord që procesi të zhvillohet mbi bazën e akteve dhe provave të grumbulluara nga prokuroria gjatë fazës së hetimit paraprak, në këmbim të një uljeje të mundshme të dënimit me një të tretën.

Pavarësisht sqarimit ligjor nga ana e gjykatës, Fatime Kryemadhi ka insistuar në qëndrimin e saj për t’iu drejtuar një gjykimi të zakonshëm. Pas kësaj lëvizjeje procedurale, trupi gjykues pritet të marrë vendim për ndryshimin e formës së gjykimit, çka do të sjellë rihapjen e plotë të fashikujve, thirrjen e dëshmitarëve dhe shqyrtimin e detajuar të provave të mbrojtjes për të ardhurat e saj.