Gjykata Themelore në Prishtinë shpall fajtor të akuzuarin që paguhej nga BIA serbe për të dërguar informacione mbi UÇK-në dhe radikalizmin fetar në Kosovë e Siri.

Gjykata Themelore në Prishtinë ka shpallur aktgjykim dënues ndaj Hysri Selimit, duke e dënuar atë me 6 vjet burgim nën akuzën e spiunazhit në favor të Agjencisë së Inteligjencës dhe Sigurisë së Serbisë (BIA). Vendimi u dha këtë të hënë nga trupi gjykues i kryesuar nga gjyqtari Leon Përlaska, ndërsa të pranishëm në seancë ishin prokurori Bekim Kodraliu dhe avokati mbrojtës Ali Beka.

Selimi, i cili më parë ka vuajtur një dënim për pjesëmarrje në organizatën terroriste ISIS, akuzohet se ka pasur një aktivitet të gjatë spiunazhi që prej nëntorit të vitit 2009 e deri në momentin e arrestimit të tij më 6 maj 2025. Përveç dënimit me heqje lirie, i cili do të ekzekutohet pas plotfuqishmërisë së vendimit, Selimi është obliguar të paguajë edhe shpenzimet e procedurës gjyqësore, ndërsa masa e paraburgimit i është vazhduar.

Sipas aktakuzës së ngritur nga Prokuroria Speciale e Republikës së Kosovës, Selimi ishte rekrutuar nga BIA serbe, e cila e kishte pajisur me mjete financiare dhe telefona celularë, duke i premtuar edhe blerjen e një shtëpie. Me udhëzim të shërbimit serb, ai kishte udhëtuar në Siri në vitin 2015 për t’u rreshtuar krah ISIS-it, me qëllim mbledhjen e të dhënave mbi numrin e luftëtarëve shqiptarë, organizimin e tyre dhe zonat ku operonin.

Hetimet zbuluan se pas kthimit në Kosovë dhe përfundimit të dënimit të parë, Selimi kishte vijuar bashkëpunimin me zyrtarë të lartë të BIA-s, përfshirë drejtorin për luftimin e terrorizmit të këtij shërbimi. Takimet sekrete zhvilloheshin në Vranjë, Nish dhe Bujanoc, ku i akuzuari dorëzonte informacione mbi zhvillimin e rrymave vehabiste në Kosovë, funksionimin e mesxhideve të paligjshme, si dhe të dhëna për veteranët e UÇK-së dhe vrasjet e pasluftës.

Prokuroria Speciale provoi se Selimi paguhej rregullisht deri në 700 euro në muaj nga inteligjenca serbe. Përmes këtyre veprimeve, Gjykata konstatoi se i dënuari ka dëmtuar rëndë rendin juridik kushtetues dhe sigurinë kombëtare të Republikës së Kosovës, duke ndihmuar strukturat e Beogradit në ndërtimin e një narrative të dëmshme për shtetësinë e Kosovës.