Paralelisht me lëvizjen në diasporë, në Tiranë organizohet sot protesta e 16-të radhazi përpara Kryeministrisë.

Valët e protestave të diasporës shqiptare kundër projektit të zhvillimit në zonën e Zvërnecit janë zhvendosur këtë të hënë në qytetin e Parmës në Itali. Qindra emigrantë shqiptarë janë tubuar me pankarta dhe simbole kombëtare, duke kërkuar anullimin e projektit dhe dorëheqjen e kryeministrit Edi Rama.

Ky organizim pason një sërë tubimesh të ngjashme që janë mbajtur më herët në qytete të tjera italiane, si Milano, Firence dhe Gjenova. Ajo që nisi fillimisht si një reagim i menjëhershëm kundër ndërhyrjeve infrastrukturore në Zvërnec, ka evoluar në një tubim me kërkesa të drejtpërdrejta politike ndaj ekzekutivit shqiptar.

Ndërkohë, situata mbetet aktive edhe në ambientin vendas. Gjatë ditës së sotme në Tiranë është njoftuar mbajtja e protestës së 16-të radhazi. Sipas organizatorëve, protestuesit do të grumbullohen fillimisht në sheshin "Skënderbej" dhe më pas do të vijojnë marshimin e tyre drejt selisë së Kryeministrisë.