SHBA – Kryeministri i Pakistanit, Shehbaz Sharif, ka njoftuar se është arritur një marrëveshje për t’i dhënë fund konfliktit mes Shteteve të Bashkuara dhe Iranit, pas më shumë se tre muajsh e gjysmë tensionesh dhe përballjesh.

Sipas Sharif, marrëveshja parashikon ndërprerjen e menjëhershme dhe të përhershme të operacioneve ushtarake në të gjitha frontet, përfshirë edhe Libanin. Ceremonia zyrtare e nënshkrimit pritet të zhvillohet më 19 qershor në Zvicër.

Kryeministri pakistanez bëri të ditur se në ditët e ardhshme do të zhvillohen kontakte dhe takime nën kujdesin e ndërmjetësve ndërkombëtarë për të përgatitur bisedimet teknike dhe procedurat që do t’i paraprijnë nënshkrimit të marrëveshjes.

Sharif falënderoi Katarin, Arabinë Saudite dhe Turqinë për rolin e tyre në procesin e ndërmjetësimit, duke vlerësuar kontributin e tyre në afrimin e palëve drejt një zgjidhjeje diplomatike.

Ndërkohë, presidenti amerikan Donald Trump ka deklaruar se, në kuadër të marrëveshjes, pritet rihapja e Ngushticës së Hormuzit dhe heqja e bllokadave detare ndaj porteve iraniane.

Sipas raportimeve mediatike, korniza e marrëveshjes përfshin angazhimin e Iranit për të mos zhvilluar apo siguruar armë bërthamore, ndërsa Shtetet e Bashkuara po shqyrtojnë mundësinë e lehtësimit të një pjese të sanksioneve ekonomike ndaj Teheranit.

Megjithatë, pavarësisht deklaratave të bëra deri më tani, as autoritetet amerikane dhe as ato iraniane nuk kanë konfirmuar zyrtarisht finalizimin e marrëveshjes, duke lënë ende hapësirë për pritje deri në një njoftim zyrtar nga të dyja palët.