Protesta kundër klasës politike hyri në ditën e saj të 15-të me një skenar ndryshe nga netët e mëparshme, teksa protestuesit bllokuan për disa orë autostradën Tiranë-Durrës dhe më pas marshuan drejt rrugës së Rinasit, në afërsi të Aeroportit Ndërkombëtar “Nënë Tereza”.

Pas qëndrimit për rreth dy orë para Kryeministrisë dhe marshimit në rrugët e kryeqytetit, protestuesit u drejtuan fillimisht drejt autostradës Tiranë-Durrës, duke shkaktuar bllokim të qarkullimit. Më pas ata vijuan lëvizjen drejt Rinasit, me synimin për t’iu afruar aeroportit.

Rreth orës 02:00 pas mesnate, protestuesit u përballën me forca të shumta policie, përfshirë Forcën e Posaçme “Shqiponja” dhe efektivë të FNSH-së, të cilët kishin ngritur disa kordonë sigurie dhe kishin pozicionuar mjete të rënda përgjatë rrugës.

Te pjesa e fundit e rrugës që të çon në aeroport, policia kishte vendosur disa automjete të saj për të penguar protestuesit.

Për rreth një orë protestuesit qëndruan të ulur në rrugën e Rinasit, ndërsa pas diskutimeve vendosën të mos avancojnë më tej dhe të kthehen drejt Tiranës, duke shmangur përshkallëzimin e situatës.

Gjatë nisjes së protestës u raportuan edhe tensione të izoluara, pasi disa persona me kapuçë dhe syze të zeza krijuan shqetësim mes pjesëmarrësve. Situata u tensionua më tej pas pretendimeve se qytetarëve po u kërkoheshin kartat e identitetit për nënshkrimin e një peticioni, akuzë që organizatorët e mohuan, duke e cilësuar si provokim.

Edhe në këtë protestë nuk munguan thirrjet për dorëheqjen e qeverisë së kryeministrit Edi Rama dhe krijimin e një qeverie tranzitore. Pjesëmarrësit shprehën pakënaqësitë ndaj klasës politike të 35 viteve të fundit përmes pankartave ironike, mesazheve satirike dhe fjalimeve të mbajtura në podiumin e ngritur para Kryeministrisë.

Një moment që u përshëndet nga protestuesit ishte largimi i deputetes së Shkodrës, Marjana Koçeku, nga grupi parlamentar i Partisë Socialiste, të cilin ata e cilësuan si një fitore të lëvizjes së tyre.

Tubimit iu bashkuan gjithashtu edhe banorë të Durrësit që kundërshtojnë projektin TID. Pas përfundimit të fjalimeve, protestuesit marshuan në rrugët e Tiranës dhe më pas u futën në segmentet e Unazës Lindore, duke vijuar aksionin e tyre gjatë orëve të natës. Rreth orës 03.00 ata u shpërndanë pa incidente.