TEKSAS, SHBA – Prania e tifozëve shqiptarë në tribunat e Kupës së Botës ka tërhequr vëmendjen edhe përtej aspektit sportiv, teksa përpara ndeshjes mes Holanda dhe Japonia janë shfaqur simbole që lidhen me zhvillimet e fundit politike në Shqipëri.

Mes flamujve të shumtë në stadium, është dalluar flamuri kombëtar shqiptar, por edhe një flamur me flamingo, simbolikë që është përdorur së fundmi në protestat e zhvilluara në Tiranë dhe qytete të tjera të vendit.

Pamjet kanë qarkulluar gjerësisht në rrjetet sociale, ku shumë përdorues i kanë interpretuar si një formë mbështetjeje të diasporës shqiptare ndaj protestave që po zhvillohen prej më shumë se dy javësh në Shqipëri.

Kjo e diel shënon ditën e 15-të të protestave, të cilat kanë tërhequr vëmendje jo vetëm brenda vendit, por edhe mes komuniteteve shqiptare jashtë kufijve.

Prania e simboleve shqiptare në një ngjarje me audiencë globale si Kupa e Botës dëshmon edhe një herë lidhjen e fortë të diasporës me zhvillimet politike dhe shoqërore në vendin e origjinës.