TIRANË – Gjatë protestës së 15-të të zhvilluar përpara Kryeministrisë, organizatorët dhe pjesëmarrësit kanë drejtuar thirrje publike ndaj Prokurorisë së Posaçme (SPAK), duke kërkuar veprime konkrete ndaj zyrtarëve të dyshuar për korrupsion.

Në fjalën e mbajtur para protestuesve, një nga organizatorët u shpreh se institucionet e drejtësisë duhet të veprojnë pa vonesë dhe të ndërmarrin masa ligjore ndaj politikanëve të përfshirë në afera korruptive.

“Thirrja shkon për SPAK-un që të veprojë para se populli shqiptar t’ju rrethojë. Nesër do të rrethoheni në mënyrë paqësore nga qytetarë dhe nuk do të dilni nga SPAK pa lëshuar urdhër-arreste për politikanët e korruptuar. Ne ju mbështesim, por nëse nuk veproni, do t’ju rrethojmë deri në urdhër-arreste. SPAK vepro! Ne jemi me ju”, u shpreh ai.

Protestuesit kanë vijuar prej ditësh tubimet në kryeqytet, ku ndër kërkesat kryesore mbeten dorëheqja e qeverisë dhe hetimi i zyrtarëve të lartë shtetërorë nga institucionet e drejtësisë.

Autoritetet nuk kanë raportuar incidente gjatë protestës, e cila është mbajtur nën masa të shtuara sigurie.