TIRANË – Deputetja e Qarkut të Shkodrës, Marjana Koçeku, e njohur edhe me nofkën “Neomalsorja”, ka njoftuar largimin e saj nga grupi parlamentar i Partisë Socialiste, duke deklaruar se do të vijojë mandatin si deputete e pavarur.

Lëvizja e saj është pritur me reagime në protestën që po zhvillohet prej ditësh përpara Kryeministrisë në Tiranë, ku qytetarët kanë shprehur mbështetje për vendimin dhe e kanë ftuar publikisht t’i bashkohet tubimit.

Organizatorët e protestës e kanë cilësuar largimin e saj si një zhvillim domethënës politik, duke deklaruar se ai mund të shënojë fillimin e një zinxhiri ndryshimesh brenda mazhorancës.

“Duhet të rrimë në shesh, ata do të bien si gurë dominoje. Ne vlerësojmë vendimin e marrë nga deputetja Marjana Koçeku, por kjo është vetëm gjysma e punës. Gjysma tjetër është të vijë në shesh e të këndojë me ne ‘Rama jepe dorëheqjen’. Do të jemi këtu derisa të mbetet vetëm, deri kur të jetë në qeli”, u shpreh një prej organizatorëve të tubimit.

Largimi i Koçekut nga grupi parlamentar socialist vjen në një klimë të tensionuar politike, ndërsa protestat kundër qeverisë vijojnë në Tiranë dhe disa qytete të tjera të vendit.

Zhvillimi i saj politik po ndiqet me vëmendje nga opinion publik dhe aktorët politikë, pasi konsiderohet si një sinjal i rëndësishëm brenda radhëve të mazhorancës në këtë periudhë të trazuar.