TIRANË – Gjatë tubimit të 15-të të zhvilluar në kryeqytet, një protestuese nga diaspora ka ngritur shqetësime për situatën ekonomike në vend dhe rolin e emigrantëve në mbështetjen e familjeve në Shqipëri.

Duke folur nga podiumi përpara Kryeministrisë, ajo u shpreh se kontributi financiar i shqiptarëve jashtë vendit është vendimtar për mbijetesën e shumë familjeve.

“Le ta themi hapur, diaspora blen ilaçet për nënat dhe baballarët, paguan ujin dhe dritat. Pa diasporën, mijëra familje nuk do të arrinin të mbijetonin”, deklaroi ajo, duke u duartrokitur nga pjesëmarrësit në tubim.

Deklarata e saj u prit me reagime pozitive nga protestuesit e pranishëm, të cilët vijojnë prej disa ditësh protestat në Tiranë, duke artikuluar kërkesa dhe shqetësime të ndryshme sociale dhe politike.

Tubimet në kryeqytet kanë mbledhur qytetarë nga shtresa të ndryshme, përfshirë edhe përfaqësues të diasporës, të cilët kanë shprehur kritika ndaj situatës ekonomike dhe varësisë së familjeve nga remitancat.