MYNIH, GJERMANI – Qindra emigrantë shqiptarë janë mbledhur në Mynih të Gjermanisë për të shprehur mbështetjen ndaj protestave që po zhvillohen prej më shumë se dy javësh në Tiranë, ku pjesëmarrësit kërkojnë dorëheqjen e qeverisë dhe të kryeministrit Edi Rama.

Tubimi u organizua pranë kampusit universitar të Universitetit Ludwig Maximilian, ku protestuesit shpalosën pankarta dhe mesazhe që pasqyronin pakënaqësitë e tyre ndaj situatës politike në Shqipëri.

Një prej pankartave më të spikatura mbante mesazhin: “Ti ndërton kulla, ne mbajmë plagë. Ti shet Shqipërinë, ne mbajmë flamurin lart. Nga Mynihu po vjen vendimi, Rama ik, ka folur mërgimi”.

Gjatë protestës u dëgjuan edhe thirrje të ngjashme me ato të artikuluara në demonstratat e zhvilluara në Tiranë, përfshirë sloganet “Rama, jep dorëheqjen”, “Shqipëri e re” dhe mesazhe të tjera me përmbajtje politike.

Protestuesit shprehën qëndrimet e tyre edhe ndaj institucioneve evropiane. Në një prej pankartave u paraqit një fotografi e Presidentes së Komisionit Evropian, Ursula von der Leyen, së bashku me kryeministrin Edi Rama, e shoqëruar me mesazhin: “Ndaloni mbështetjen ndaj regjimit kriminal”.

Tubimi në Mynih konsiderohet si një shprehje solidariteti e diasporës shqiptare me protestat që po zhvillohen në Shqipëri, duke reflektuar interesimin e emigrantëve për zhvillimet politike në vendin e origjinës.