Detaje të reja kanë dalë në dritë nga aksidenti i rëndë rrugor i ndodhur paraditen e kësaj të diele në aksin Pogradec–Qafë Thanë, ku ka humbur jetën një 26-vjeçare nga Maqedonia e Veriut.

Sipas informacionit paraprak të Policisë, rreth orës 11:30, automjeti që drejtohej nga shtetasi G. H., banues në Korçë, është përplasur me një automjet me targa të huaja, që drejtohej nga shtetasi E. Ll., banues në Maqedoninë e Veriut.

Si pasojë e përplasjes së fortë ka ndërruar jetë Elmedina Lloga, 26 vjeçe, banuese në Maqedoninë e Veriut, e cila udhëtonte si pasagjere në automjetin me targa të huaja.

Nga aksidenti janë plagosur gjithashtu të dy drejtuesit e mjeteve, si dhe dy pasagjerë të tjerë që ndodheshin në automjetet e përfshira në përplasje. Të lënduarit janë transportuar në spital dhe po marrin ndihmë mjekësore, ndërsa mësohet se ndodhen jashtë rrezikut për jetën.

Menjëherë pas ngjarjes, në vendngjarje mbërritën shërbimet e Policisë dhe grupi hetimor, të cilët po punojnë për zbardhjen e plotë të rrethanave dhe shkaqeve që çuan në aksidentin fatal.