Pogradec, 14 qershor 2026 – Policia ka dhënë informacionin paraprak lidhur me aksidentin e rëndë të ndodhur paraditen e së dielës në aksin rrugor Pogradec–Qafë Thanë, ku humbi jetën një 26-vjeçare nga Maqedonia e Veriut.

Sipas njoftimit zyrtar, rreth orës 11:30, automjeti që drejtohej nga shtetasi G.H., banues në Korçë, është përplasur me një automjet me targa të huaja, me drejtues shtetasin E.Ll., banues në Maqedoninë e Veriut.

Si pasojë e përplasjes ka ndërruar jetë Elmedina Lloga, 26 vjeçe, banuese në Maqedoninë e Veriut, e cila udhëtonte si pasagjere në automjetin me targa të huaja.

Nga aksidenti janë dëmtuar gjithashtu të dy drejtuesit e mjeteve dhe dy pasagjerë të tjerë që ndodheshin në automjetet e përfshira në përplasje. Sipas policisë, katër të lënduarit janë transportuar në spital, ku po marrin mjekim dhe ndodhen jashtë rrezikut për jetën.

Grupi hetimor ndodhet në vendin e ngjarjes dhe po vijon punën për zbardhjen e plotë të rrethanave dhe shkaqeve që çuan në aksidentin fatal.