Tiranë, 14 qershor 2026 – Një shpërthim me lëndë plasëse është regjistruar në orët e para të mëngjesit në zonën e Mjull-Bathore, duke shkaktuar dëme materiale në një banesë.

Sipas njoftimit zyrtar të policisë, ngjarja ka ndodhur në rrugën “Haki Husha”, ku dyshohet se një sasi e vogël lënde plasëse është vendosur dhe ka shpërthyer në portën e jashtme të banesës së shtetasit me inicialet D.S.

Si pasojë e shpërthimit janë shkaktuar vetëm dëme materiale, ndërsa fatmirësisht nuk raportohet për persona të lënduar.

Menjëherë pas sinjalizimit, në vendngjarje mbërritën shërbimet e policisë dhe grupi hetimor, të cilët nisën veprimet për dokumentimin e ngjarjes dhe mbledhjen e provave.

Autoritetet po punojnë për zbardhjen e plotë të rrethanave të incidentit, identifikimin e autorit dhe përcaktimin e motiveve që mund të kenë çuar në vendosjen e lëndës plasëse. Hetimet vijojnë.