Edhe pse Shqipëria nuk është mes 48 skuadrave pjesëmarrëse në Kupën e Botës 2026, vendi pritet të përfitojë nga efekti ekonomik që gjeneron eventi më i madh i futbollit në planet.

Me zhvillimin e ndeshjeve në Shtetet e Bashkuara, Kanada dhe Meksikë, Botërori aktivizon një zinxhir të gjerë ekonomik që shtrihet përtej vendeve organizatore. Baret, restorantet, televizionet, platformat sportive, bizneset e argëtimit dhe sektori i reklamimit përfitojnë nga rritja e interesit dhe konsumit gjatë turneut.

Interesi i tifozëve shqiptarë pritet të përqendrohet te kombëtaret tradicionale si Gjermania, Zvicra, Anglia, Franca, Spanja dhe Portugalia. Veçanërisht Zvicra mbetet një nga ekipet më të ndjekura për shkak të lidhjeve të forta me komunitetin shqiptar, ndërsa Portugalia tërheq vëmendje falë figurës së Cristiano Ronaldo.

Nga ana ekonomike, Botërori 2026 pritet të jetë eventi më fitimprurës në historinë e FIFA. Organizata parashikon të ardhura prej rreth 13.1 miliardë dollarësh gjatë ciklit 2023-2026, ku një pjesë e konsiderueshme do të vijë nga të drejtat televizive, sponsorizimet dhe aktivitetet tregtare të lidhura me turneun.

Në Shqipëri, të drejtat ekskluzive të transmetimit të të gjitha 104 ndeshjeve janë siguruar nga TV Klan, duke krijuar mundësi të mëdha për tregun e reklamave dhe sponsorët vendas. Sipas vlerësimeve të industrisë, zgjerimi i turneut nga 64 në 104 ndeshje ka rritur ndjeshëm potencialin komercial të transmetimeve televizive.

Ekspertët vlerësojnë se përfitimet për ekonominë shqiptare do të vijnë kryesisht nga rritja e konsumit gjatë ndeshjeve, reklamimi, shitja e pajisjeve elektronike, abonimet sportive, aktiviteti në lokale dhe udhëtimet turistike të lidhura me Botërorin.

Megjithëse Kombëtarja shqiptare mungon në fushë, Shqipëria mbetet pjesë e ekonomisë globale që krijon spektakli i futbollit, duke përfituar nga miliona tifozë që ndjekin eventin më të madh sportiv në botë.