BRAZIL, 14 Qershor 2026 – Në ditën e debutimit të Brazilit në Kupën e Botës, presidenti i vendit, Luiz Inácio Lula da Silva, i ka dërguar një mesazh motivues trajnerit të kombëtares, Carlo Ancelotti, duke i kërkuar ekipit të luajë me vendosmëri dhe të synojë vetëm fitoren.

Në një video të publikuar në rrjetet sociale, kreu i shtetit brazilian theksoi rëndësinë e unitetit dhe harmonisë brenda skuadrës, duke nënvizuar se futbollistët duhet të përfaqësojnë me krenari popullin brazilian.

“Ajo që ka rëndësi është vendosmëria, kohezioni dhe harmonia e ekipit. Lojtarët duhet të jenë të motivuar dhe të luajnë duke menduar për popullin brazilian, i cili ka nevojë për një fitore. Nëse ke sukses, Ancelotti, do të bëhesh heroi ynë”, deklaroi Lula.

Presidenti brazilian përsëriti gjithashtu ambicien e lartë të vendit në turneun më të madh të futbollit botëror.

“Ti ke ekipin, por në Kupën e Botës nuk konkurron, por fiton. Ne nuk shkojmë për të konkurruar, ne shkojmë për të fituar”, u shpreh ai.

Mesazhi i Lulës vjen në një moment kur pritshmëritë e tifozëve brazilianë janë të mëdha për përfaqësuesen, e cila synon të rikthehet në majën e futbollit botëror nën drejtimin e Ancelottit.