Brazili dhe Maroku kanë ndarë pikët në një nga përballjet më të forta të Grupit C në Kupën e Botës, duke barazuar 1-1 në ndeshjen e zhvilluar në Nju Jork.

Përfaqësuesja marokene e nisi më mirë takimin dhe shpërbleu dominimin e saj në minutën e 21-të, kur Ismael Saibari realizoi një gol të bukur pas një kundërsulmi të shpejtë, duke kaluar “Atlas Lions” në avantazh.

Reagimi i Brazilit ishte i menjëhershëm. Në minutën e 32-të, Vinicius Junior riktheu ekuilibrat me një aksion individual spektakolar, duke shënuar golin e barazimit për “Seleção”.

Pjesa e mbetur e takimit u karakterizua nga ritëm i lartë dhe raste në të dy portat, por asnjëra skuadër nuk arriti të gjente golin e fitores.

Me këtë rezultat, Brazili dhe Maroku sigurojnë nga një pikë secili dhe kryesojnë përkohësisht renditjen e Grupit C, në pritje të sfidës mes Haitit dhe Skocisë.

Barazimi konfirmon forcën e dy skuadrave, të cilat mbeten mes pretendentëve për të avancuar në fazën e eliminimit direkt të Kupës së Botës.