LEZHË – Policia e Lezhës ka finalizuar operacionin e koduar “Llogaritë”, duke zbardhur një seri vjedhjesh të ndodhura gjatë muajve të fundit në qytet dhe duke identifikuar autorët e dyshuar.

Sipas njoftimit zyrtar, hetimet nisën pas kallëzimeve të disa administratorëve biznesesh, të cilët denoncuan vjedhjen e xhirove ditore në subjektet e tyre gjatë muajve maj dhe qershor 2026.

Si rezultat i veprimeve hetimore, në pranga është vënë shtetasi M. M., 21 vjeç, banues në Lezhë, ndërsa është shpallur në kërkim E. U., 26 vjeç, i dyshuar si bashkëpunëtor në të njëjtën veprimtari kriminale.

Nga hetimet paraprake dyshohet se dy të rinjtë kanë bashkëpunuar për të realizuar vjedhjen e xhirove ditore në 12 subjekte tregtare në qytetin e Lezhës.

Policia bën me dije se vijon puna për kapjen e 26-vjeçarit të shpallur në kërkim, si dhe për verifikimin e përfshirjes së tyre të mundshme në raste të tjera vjedhjesh.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme hetimore.